Festeggiamenti del Centenario della Ferrovia "Piedimonte", al vecchio capolinea di Piedimonte Matese, domani ore 9:30

Una poesia dedicata alla storica ferrovia “Napoli-Piedimonte D’Alife”

Comm’era bella ‘a Piedimonte!

(Poesia pubblicata nel “sito Internet”: www.lestradeferrate.it e nel libro: "Piscinola, la terra del Salvatore", ed. Boopen, anno 2010)

Quanno veco ‘e piccerille                                        

Ca pazzejano cu’ ‘e trenine                                      

M’arricordo quanne pur’io                                      

Pazziavo criaturielle                                                 

Cu’ nu treno…, ma overamente!                            

Ca chiammavano ‘a Piedimonte…!                       

Stu trenino ca passave

Poche vvote ‘int’’a ghiurnata,

Jeva a na città ‘e Caserta

Cu’ nu semplice bbinarie,

Ogni tanto se fermava dint’ ‘a stazione,

Pigliava ‘a ggente e po’ se ne jeva.

Se ne jeva pe’ campagne

Verde e fresche,

Se ne jeva passanne

Sciumme e fuossa…

Era nu spettacolo a vederse!

Era comm’ ‘a na pazziella…, ma assaje cchiù grossa…!

Te purtava pe’ massarie e casale, 

mmiez’ ‘a ppastene ‘e mele annurca,

pe’ na terra assaje gentile,

chiena d’arbere ‘e giardina,

chiena ‘e sciure a pprimmavera

c’arraccuntà nun ce se crera…!

Ma chiustu suonno duraje poco…

Dint’ ’o lasso ‘e poco tiempo,

Nce fermajeno trent’anne fa,

stu trenino dint’ ‘a storia

senza scrupolo e ppietà,

cu’ ‘o pretesto d’ ’o cagnà!

Doppo che è passato ‘o tiempo,

n’atu treno mo ce veno,

ma è na fredda scatulella,

ca se sposta sott’ ‘a terra,

viaggia ‘o scuro e senza sole,

gialla e grigia, ma senza core…!

Nun ce resta che tenè ’a mmente

comm’erano belli chilli tiempe,

quanno tutt’ ‘e piccerille d’ ’o paese

salutavano ‘a Piedimonte,

cu’ n’alleria e spensieratezza,

ca è sulo ricordo chin’ ’e tristezza...!

 

S. Fioretto 

(Tutti i diritti per la pubblicazione dei testi del blog sono riservati all'autore, ai sensi della legislazione vigente)